Rúmlega 30 myndlistarmenn hafa tekið höndum saman og gefið verk sín til þess að styðja við húsbyggingu fyrir börnin í Glidji. Sýning á verkunum verður haldin í Hannesarholti við Grundarstíg 10. Sýningin opnar laugardaginn 23. nóvember kl. 17 og verður opin alla vikuna frá kl. 11 - 18. Þar gefst fólki kostur á því að skoða og kynnast verkunum fyrir uppboðið sjálft. Uppboð á verkum fer fram á lokadegi sýningarinnar þann 30. nóvember frá kl. 14 – 16. Verkin spanna breitt litróf íslenskrar nútímalistar, einsog hún gerist best í dag.

Á opnuninni, laugardaginn 23.nóvember verður hátíðarstemmning í Hannesarholti. Hornleikarinn Lilja Valdimarsdóttir mun taka á móti gestum með lúðrablæstri kl.17.00. Í kjölfarið mun tónlistarmaðurinn Úlfur Eldjárn improvisera á píanó og tölvu í matstofunni. Veitingastaður Hannesarholts mun fara í Tógó búning í tilefni dagsins og Sól í Tógó býður upp á Bissap sem er vinsæll svaladrykkur í Tógó. Auk þessa verður selt ómótstæðilegt súkkulaði frá nýja súkkulaði fyrirtækinu Omnom sem mun renna beint í söfnunina.